Қазақстанда көлік құралдары иелерінің азаматтық-құқықтық жауапкершілігін міндетті сақтандыру (КҚИ АҚЖМС) бойынша сақтандыру төлемдерін алу тәртібі өзгереді.
2026 жылғы 21 қазаннан бастап сақтандыру компаниялары жол-көлік оқиғасынан зардап шеккен азаматтарға тиесілі төлемдерді тек банк шоттарына аударады. Бұл ретте ақша аудару және оны есепшотқа түсіруге байланысты шығындарды сақтандыру ұйымының өзі өтеуге міндетті болады.
Яғни сақтандыру төлемінің сомасынан банк операциясына байланысты комиссия ұсталмауы тиіс. Алушы өзіне тиесілі қаражатты толық көлемде алуы керек.
Қаржы нарығын реттеу және дамыту агенттігінің мәліметінше, қолма-қол ақшасыз есеп айырысуға көшу сақтандыру төлемдерінің ашықтығын арттыруға және тұтынушылардың құқықтарын қорғауға бағытталған. Сонымен қатар бұл механизм қаражаттың тікелей зардап шеккен адамға түсуін қамтамасыз етіп, сақтандыру жағдайларын реттеудегі ашық емес схемаларды азайтуға мүмкіндік береді.
Тиісті өзгерістер «Көлік құралдары иелерінің азаматтық-құқықтық жауапкершілігін міндетті сақтандыру туралы» Қазақстан Республикасы Заңының 25-бабына енгізілді.
Жүргізушілер үшін бұл нені білдіреді?
Жаңа ережелер күшіне енгеннен кейін міндетті автосақтандыру бойынша төлемді қолма-қол алу қарастырылмайды. Қаражат азаматтың банк шотына аударылады.
Бұл ретте жүргізуші сақтандыру төлемін алу үшін ақша аудару немесе оны есепшотқа түсіру комиссиясын өзі төлемейді. Мұндай шығындар сақтандыру компаниясына жүктеледі.
Өзгерістер Қазақстанның сақтандыру нарығындағы кең ауқымды реформалар аясында енгізіліп отыр. Бұған қоса, міндетті автосақтандыру құнын есептеудің жаңа тәсілдері қарастырылуда. Болашақта полис бағасын әр жүргізушіге жеке есептеу және оның құнына жүргізушінің еңбек өтілі, көлік жүргізу мәнері мен апатқа ұшырау көрсеткіші сияқты факторларды ескеру жоспарлануда.
Осылайша, жаңа ережелер ең алдымен сақтандыру төлемін алу тәртібіне қатысты. Жүргізушілер үшін басты өзгеріс — қаражаттың міндетті түрде банк шотына аударылуы және банк комиссиясының сақтандыру компаниясы тарапынан төленуі.
