Қазақстанда 4,5 миллионнан астам әйел экономикалық қызметке қатысады. Ұлттық статистика бюросының мәліметінше, 2026 жылдың бірінші тоқсанында жұмыспен қамтылған әйелдер саны 4 527 100 адамды құрады. Бұл өткен жылдың сәйкес кезеңімен салыстырғанда 42,6 мың адамға немесе 0,9%-ға көп.
Олардың басым бөлігі жалдамалы жұмысшылар — 3,6 миллион адам, яғни жұмыспен қамтылған әйелдердің 79,6%-ы. Ал 925,1 мың әйел өзін-өзі жұмыспен қамтығандар санатына жатады.
Әйелдер ең көп жұмыс істейтін сала — білім беру. Бұл бағытта шамамен 902,2 мың әйел еңбек етеді. Бұл елдегі жұмыспен қамтылған әйелдердің жалпы санының 19,9%-ын құрайды.
Екінші орында көтерме және бөлшек сауда тұр. Бұл салада 877,6 мың әйел немесе жалпы көрсеткіштің 19,4%-ы жұмыс істейді. Үшінші орында денсаулық сақтау және халыққа әлеуметтік қызмет көрсету саласы — 426,3 мың адам.
Сонымен қатар әйелдердің едәуір бөлігі өнеркәсіпте — 388,1 мың адам, сондай-ақ ауыл, орман және балық шаруашылығында — 351,2 мың адам еңбек етеді.
Бір жыл ішінде әйелдер жұмыспен қамтылуының ең жоғары өсімі жылжымайтын мүлікпен жасалатын операциялар саласында байқалды — 25,7%-ға өскен. Одан кейін әкімшілік және қосалқы қызмет көрсету саласы (+21,9%), көлік және қоймалау (+16,2%), сондай-ақ өнеркәсіп (+7,6%) тұр.
Өңірлер арасында жұмыс істейтін әйелдер саны Қарағанды облысында 7,8%-ға, Ақтөбе облысында 6,5%-ға, Алматы қаласында 6,3%-ға және Түркістан облысында 6,1%-ға артқан.
Сонымен қатар қалалық жерлерде жұмыспен қамтылған әйелдердің саны ауылдық жерлерге қарағанда жоғары. 2026 жылдың бірінші тоқсанында қалаларда жұмыс істейтін әйелдер саны 3 008 500 адамға жетті.
