Шілде айының соңында Қазақстанда ауа райы қайта құбылмақ. Қазгидромет болжамына сәйкес, 25–27 шілде аралығында ел аумағына Иран жақтан ыстық ауа массалары келе бастайды. Кейбір өңірлерде ауа температурасы +43°C-қа дейін көтерілуі мүмкін.
Сонымен қатар аптап ыстық тұрақсыз ауа райымен қатар жүреді. Қазақстанның басым бөлігінде жаңбыр мен найзағай сақталады. Кей жерлерде қатты нөсер, бұршақ, шквал және екпінді жел болуы ықтимал.
Қай өңірлерде ыстық болады?
Ең жоғары температура:
батыс және солтүстік-батыста — +38…+43°C;
оңтүстікте — +36…+41°C;
орталықта — +28…+39°C;
оңтүстік-шығыста — +29…+37°C;
солтүстікте — +30…+35°C;
солтүстік-шығыс пен шығыста — +23…+32°C аралығында болады деп болжануда.
Жаңбыр мен найзағай қайда болады?
Атлантикалық циклонның әсері Қазақстанның басым бөлігінде сақталады. Бірқатар өңірде найзағайлы жаңбыр жауып, кей жерлерде нөсер, бұршақ және қатты жел болуы мүмкін.
Синоптиктердің болжамынша, батыс және солтүстік-батыс өңірлерде айтарлықтай жауын-шашын болмайды.
Бұл — Қазақстанда шілде айында тіркелген жоғары температурадан кейінгі жаңа ыстық толқын. 14 шілдеде Астанада ауа температурасы +38,6°C-қа жетіп, осы күнге арналған жаңа рекорд орнады. Ал Алматыда 16–18 шілде аралығында ауа температурасы +40°C-қа дейін көтеріліп, бірнеше ондаған жыл бойы сақталған максималды көрсеткіштер жаңарды.
