Қазақстанда мемлекеттік цифрлық сервистерді пайдалану кезінде азаматтардың дербес деректерін қорғау шаралары күшейтіліп жатыр. Бұл туралы 11 тамызда Үкімет отырысында Жасанды интеллект және цифрлық даму министрі Жаслан Мадиев мәлімдеді.
Министрдің айтуынша, цифрлық сервистерді дамыту және жасанды интеллектіні енгізу кезінде азаматтардың қауіпсіздігі мен ақпаратты қорғау басты басымдықтардың біріне айналып отыр. Мемлекеттік ақпараттық жүйелердегі деректерді сақтау, пайдалану және беру тәртібіне ерекше көңіл бөлінеді.
eGov пайдаланушылары нені бақылай алады
Жаңа талаптар мемлекеттік дерекқорлардағы ақпаратпен жұмыс істеу тәртібін күшейтеді. Сонымен қатар eGov пайдаланушылары өздерінің дербес деректеріне кім және қандай мақсатпен жүгінгенін көре алады.
Азаматтар ақпаратты өңдеуге келісім беруге немесе одан бас тартуға да мүмкіндік алады.
Фото арқылы биометриялық тексеруден өтуге бола ма?
Жаслан Мадиевтің айтуынша, биометриялық сәйкестендіру кезінде жүйе камера алдында нақты адамның тұрғанын қосымша тексереді. Сондықтан қарапайым фото немесе дипфейк арқылы адамның орнына тексеруден өту мүмкін емес.
Жеке тұлғаны растау үшін SMS-код, электрондық цифрлық қолтаңба және пароль сияқты қосымша қауіпсіздік тетіктері де қолданылады. Бірнеше деңгейлі қорғау мемлекеттік цифрлық сервистердегі деректерге рұқсатсыз қол жеткізу қаупін азайтуға бағытталған.
Премьер-министр Олжас Бектенов дербес деректерді қорғау талаптарын қатаң сақтаудың маңызын атап өтті.
