Желіде америкалық рэпер Kanye West-тің Алматыда концерт беруі мүмкін екені туралы ақпарат тарады. Алдын ала мәлімет бойынша, концерт 14 тамызда Орталық стадионда өтіп, билет сатылымы 20 шілдеде басталуы мүмкін.
Әзірге ұйымдастырушылар да, әртістің өзі де бұл ақпаратты ресми түрде растаған жоқ. Соған қарамастан, жаңалық жанкүйерлер арасында үлкен қызығушылық тудырды.
Сонымен қатар «Қайрат» футбол клубы концерт өтетін күн клубпен келісілмегенін мәлімдеді. Бұл уақытта команда Қазақстан чемпионаты мен еурокубоктар аясындағы өз алаңындағы матчтарын өткізеді.
Клуб өкілдерінің айтуынша, сахна мен техникалық жабдықтарды орнату стадионның көгалын зақымдап, спорттық инфрақұрылым жұмысына кедергі келтіруі мүмкін. Сондықтан барлық тарап ортақ келісімге келмейінше, концерттің дәл осы жерде өтетіні туралы айтуға әлі ерте.
